Honor ilin əvvəlində hərəkətli kamera qolu olan “Robot telefon”unu ilk dəfə təqdim etmişdi. Mobile World Congress (MWC) sərgisi ərəfəsində Çin şirkəti cihaz haqqında daha ətraflı məlumat verdi və robotun əmrsiz şəkildə müxtəlif situasiyalara necə reaksiya verə bildiyini açıqladı. Şirkət bildirib ki, bu cihazı ilin ikinci yarısında bazara çıxarmağı planlaşdırır.
Honor qeyd edib ki, robotun özünəməxsus “şəxsiyyəti” var və o, istifadəçiyə “baş hərəkətləri” ilə cavab verə bilir, həmçinin musiqinin ritminə uyğun rəqs edə bilir. İstifadəçilər telefondakı köməkçi ilə həm mətn, həm də səs vasitəsilə ünsiyyət qura bilirlər. Təqdim olunan videoda bir istifadəçi geyim seçimi ilə bağlı sual verir və robot başını tərpədərək uyğun variantı təklif edir.
Telefon 200 meqapiksellik kameraya malikdir. Kamera üçoxlu (3-axis) stabilizasiya sistemli hərəkətli robot qimbal üzərində yerləşir. Şirkətin bildirdiyinə görə, kamera sərbəst şəkildə dönərək axıcı video və şəkillər çəkə bilir. Cihazda video çəkilişi üçün “Super Steady” rejimi də mövcuddur. Bundan əlavə, “Spinshot” funksiyası sayəsində robot kamera 90 və ya 180 dərəcə fırlanaraq kinematoqrafik kadrlar əldə etməyə imkan verir.
Dərc edildi:
01.03.2026
